لەوزەتێن چییە؟ هۆكارو چارەسەرییەكانی
لەوزەتێن بریتیە لەدوو گرێی لیمفاوی كەدەكەونە هەردوو لای قوڕگ و بەرگریكاری یەكەمن لەتوشبوون بە بەكتریا و ڤایرۆس و بەهۆی كۆمەڵێك هۆكاری جیاجیاوە تووشی هەوكردن و هەڵاوسان دەبن و پێویست دەكات چارەسەر بكرێت.
جۆرەكانی هەوكردنی لەوزەتێن:
*هەوكردنی توندی لەوزەتێن: نیشانەكانی دەمێنێتەوە لەماوەی نێوان 3 بۆ 4 رۆژ تاوەكو 2 هەفتە.
*هەوكردنی دووبارەی لەوزەتێن: نەخۆش لەماوەی ساڵێكدا چەند جارێك تووشی دەبێت.
*هەوكردنی بەردەوامی لەوزەتێن: نەخۆشەكە بەردەوام نیشانەكانی دەبێت وەكو هەوكردنی گەروو و لەوزەتێنەكان و بۆنی ناخۆشی دەم.
نیشانەكانی هەوكردنی لەوزەتێن:
1- هەڵئاوسانی لەوزەتێن و دەركەوتنی پەڵەی سپی و زەرد لەسەر لەوزەتێنەكان.
2- ئاستەنگی لە قوتدانی خواردن و بۆنی ناخۆشی دەم.
3- بەرزبوونەوەی پلەی گەرمی لەش و تەنگە نەفەسی.
4- گۆڕانكاریی لەدەنگ بەهۆی هەوكردنی لەوزەتێنەكان.
5- هەڵئاوسانی لیمفە گرێكان بەتایبەت لە ناوچەی مل و قوڕگ.
چارەسەركردنی هەوكردنی لەوزەتێن:
- چارەسەركردن لە ماڵەوە: كەسی توشبوو دەتوانێت خۆی چارەسەر بكات لەماڵەوە ئەویش بەپشوودان و خواردنەوەی شلەمەنی زۆر ، غەرغەرەكردن بەئاوی گەرم و خوێ و دوركەوتنەوە لە شوێنی تەپ و تۆزاوی و جگەرەكێشان.
- بەكارهێنانی ئەنتی بایوتیك: ئەوەش لەكاتێكدا بەكاردێت كە هەوكردنەكە بەهۆی بەكتریاوە بێت و بەپێی رێنمای پزیشك دەبێت.
- نەشتەرگەری لابردنی لەوزەتێن: بۆ ئەو نەخۆشانە دەكرێت كەهەوكردنی زۆر و دووبارەیان هەیە و لەلایەن پزیشكی پسپۆرەوە بڕیاری لێ دەدرێت.
